(१) ऐनको दफा ३ को उपदफा ३.१ बमोजिम सम्बन्धन प्राप्त उच्च माध्यमिक विद्यालयको व्यवस्थापन सम्बन्धी कार्य शिक्षा नियमावली, २०४९ बमोजिम गठित माध्यमिक विद्यालय व्यवस्थापन समितिले गर्नेछ ।
(२) ऐनको दफा ३ को उपदफा ३.२ बमोजिम सम्बन्धन प्राप्त उच्च माध्यमिक विद्यालयको व्यवस्थापन सम्बन्धी कार्य देहाय बमोजिमको व्यवस्थापन समितिले गर्नेछः–
(क) स्थानीय अभिभावक, चन्दादाता, शिक्षाप्रेमी र समाजसेवीहरु मध्ये जिल्ला शिक्षा अधिकारीले सिफारिस गरी पठाएका तीन जना व्यक्तिहरु मध्येबाट परिषद्बाट मनोनित व्यक्ति – अध्यक्ष
(ख) जिल्ला शिक्षा कार्यालयको अधिकृतस्तरको प्रतिनिधि – सदस्य
(ग) सम्बन्धित गाउँ विकास समितिको अध्यक्ष वा नगरपालिकाको सम्बन्धित वडा सदस्य – सदस्य
(घ) स्थानीय समाजसेवी, बुद्धिजीवी वा शिक्षाप्रेमी मध्ये कम्तीमा एकजना महिला पर्ने गरी क्षेत्रीय शिक्षा निर्देशकको सिफारिशमा परिषद्बाट
मनोनित दुई जना – सदस्य
(ङ) अभिभावक तथा चन्दादाताहरु मध्ये एक एक जना पर्ने गरी जिल्ला शिक्षा समितिको सिफारिसमा परिषद्बाट मनोनित दुईजना – सदस्य
(च) सम्बन्धित उच्च माध्यमिक विद्यालयमा अध्यापन गर्ने शिक्षकहरुले आफूमध्येबाट छानेको शिक्षक प्रतिनिधि एक जना – सदस्य
(छ) सम्बन्धित उच्च माध्यमिक विद्यालयका प्रधानाध्यापक – सदस्य–सचिव
(३) उपनियम (२) बमोजिम गठित व्यवस्थापन समितिका मनोनित पदाधिकारीहरुको पदावधि दुई वर्षको हुनेछ ।